Ginebra vs Magnolia ngayon
MANILA, Philippines – Kaagad magtutuos ang nagdedepensang Barangay Ginebra at Magnolia sa ‘Manila Clasico’ sa quarterfinal round ng 2019 PBA Commissioner’s Cup.
Lalabanan ng No. 4 Gin Kings ang No. 5 Hotshots ngayong alas-6:45 ng gabi matapos ang bakbakan ng No. 3 Blackwater Elite at No. 6 Rain or Shine Elasto Painters sa Game One ng kani-kanilang best-of-three quarterfinals series sa MOA Arena sa Pasay City.
“We gonna have to come out, and if we wanna win, we just need to come out and perform at the top of our game,” sabi ni one-time PBA Best Import Justin Brownlee sa pagsagupa ng Ginebra sa Magnolia.
Sumasakay ang Gin Kings sa tatlong dikit na panalo, habang nasa apat na sunod na kamalasan ang Hotshots na muling ibabandera si dating NBA player Rakeem Christmas.
Nagmula ang Ginebra sa 127-123 overtime win laban sa sibak nang Columbian kung saan humataw si Brownlee ng 50 points, 14 rebounds at 5 assists at nagsalpak ng game-clinching bucket.
Nakalasap naman ang Magnolia ng 83-98 kabiguan sa No. 1 TNT Katropa sa debut game ni Christmas, pumalit kay James Farr.
“It doesn’t take a lot of motivation to get ready for a Manila Clasico. And obviously, it’s the playoffs so it’s times two,” wika ni two-time PBA Grand Slam champion coach Tim Cone sa pagbangga ng kanyang Gin Kings sa Hotshots ni mentor Chito Victolero.
Nauna nang pinatumba ng Ginebra ang Magnolia, 102-81, sa una nilang pagtutuos sa elimination round.
Samantala, mag-uunahan din ang Blackwater at Rain or Shine sa pag-angkin sa 1-0 bentahe sa kanilang sariling serye.
Muling kinuha ng Elite si reinforcement Greg Smith, una nilang tinapik noong 2017, para palitan ang may knee injury na si Stephon Blair sa pagsagupa sa Elasto Painters.
Habang sinusulat ito ay kasalukuyang naglalaban ang Alaska at Meralco sa playoff para sa huling quarterfinal slot.
- Latest