EJ Obiena naka-gold sa World Univ. Games

MANILA, Philippines — Nasungkit ni Philippine national record holder Ernest John Obiena ang gintong medalya sa prestihiyosong 2019 Summer World University Games na ginaganap sa Napoli, Italy.

Pinagharian ng University of Santo Tomas standout and men’s pole vault matapos magrehistro ng impresibong 5.76 metro.

Nalampasan din ni Obiena ang Southeast Asian Games record na 5.35m na naitala ni Porrant Purahong ng Thailand noong 2017 edisyon sa Kuala Lumpur, Malaysia.

Winasak din ni Obiena ang  Philippine national record na 5.71m na siya rin ang may hawak.

May apat na sentimentro na lamang itong kapos sa 5.80m na qualifying standard para sa 2020 Olympic Games sa Tokyo, Japan.

Naungusan ni Obiena sa Universiade si silver medalist Torben Biech ng Germany na may parehong 5.76m dahil sa countback habang nagkasya sa tanso si 2017 European U23 champion Ben Broeders ng Belgium na nagsumite naman ng 5.51m.

Sunod na sasabak si Obiena sa 2019 World Championships na idaraos sa Setyembre 27 hanggang Oktubre 6 sa Doha, Qatar.

Ito ang ikalawang gintong medalya ng Pilipinas sa Universiade.

Nauna nang nakasungkit ng ginto si Grandmaster Wesley So sa men’s standard chess noong 2013 edisyon sa Kazan, Russia.

Noong 2017 Universiade sa Taipei, Taiwan, nakahirit ng pilak na medalya si Jomar Balangui sa men’s sanda 52kg. event ng wushu.