Leonard, George lilipat sa Clippers
Howard dinala ng Wizards sa Grizzlies
LOS ANGELES -- Nagpahayag ng kanyang kondisyon si Kawhi Leonard sa Clippers.
At kaagad itong sinunod ng koponan.
Pumayag si Leonard na maglaro para sa Clippers kasabay ng paglipat ni Paul George mula sa Oklahoma City Thunder.
Nauna nang sinabi ni Leonard, iginiya ang Toronto Raptors para sa kauna-unahan nitong NBA championship, na lilipat lamang siya sa Clippers kung makakasama niya si George.
Para naman mahugot si George ay ibinigay ng Clippers sa Thunder sina guard Shai Gilgeous-Alexander at forward Danilo Gallinari, ang apat na unprotected first-round picks, isang protected first-round pick at dalawang pick swaps.
Ang 28-anyos na si Leonard (Los Angeles) at ang 29-anyos na si George (Palmdale) ay parehong tubong Southern California.
Tatanggap si Leonard ng four-year, $142 million maximum contract.
Nahugot ng Raptors sina Leonard at Danny Green mula sa San Antonio Spurs kapalit nina DeMar DeRozan, Jakob Poeltl at isang protected first-round pick.
Napanood lamang ang star forward sa siyam na laro para sa Spurs dahil sa kanyang right quadricep injury.
Sa nakaraang regular season ay naglista si Leonard ng mga averages na 26.6 points, 7.3 rebounds, 3.3 assists at 1.8 steals sa 60 games para sa Toronto.
Itinaas pa niya ito sa postseason mula sa kanyang mga hinakot na 30.5 markers, 9.1 boards at 3.9 assist per game.
Isinara ni Leonard ang postseason na may kabuuang 732 points, ang third-highest total sa kasaysayan ng NBA Playoffs sa ilalim nina Michael Jordan (759; 1992) at LeBron James (748; 2018).
Si Leonard ang ikatlong Raptors superstar na umalis sa pamamagitan ng free agency matapos sina Tracy McGrady (Orlando Magic; 2000) at Chris Bosh (Miami Heat; 2010).
Nagposte naman ang 6-foot-9 na si George ng mga averages na career-best 28.0 points, 8.2 rebounds at 4.1 assists sa nakaraang season para sa Oklahoma City.
Sinasabing may sigalot sina George at Thunder star guard Russell Westbrook kaya hindi na nagdalawang-isip ang Oklahoma City.
Samantala, dinala ng Washington Wizards si star center Dwight Howard sa Memphis Grizzlies kapalit ni swingman C.J. Miles.
Plano ng Grizzlies na i-trade ang veteran center.
Sa pagkuha kay Miles ay makakatipid ang Wizards ng $3.1 milyon.
Ang 33-anyos na si Howard ay may kontrata pang nagkakahalaga ng $5.6 milyon.
Nakita lamang siya sa siyam na laro para sa Washington sa nakaraang season at nagtala ng mga averages na 12.8 points at 9.2 rebounds.
Sa kanyang 15 seasons sa NBA ay naglaro si Howard para sa Orlando Magic, Los Angeles Lakers, Houston Rockets, Atlanta Hawks, Charlotte Hornets at Wizards.
- Latest