Hotshots diretso sa pang-limang sunod
MANILA, Philippines — Maski ang pagpaparada sa kanilang pangatlong import sa ikatlong sunod nilang laro ay hindi nakatulong sa Meralco.
Humataw ang Magnolia Hotshots sa fourth quarter para pabagsakin ang Bolts, 99-88, sa 2019 PBA Commissioner’s Cup kahapon sa MVA City Coliseum sa Zamboanga City.
Ipinoste ng Magnolia ang kanilang pang-limang dikit na arangkada matapos ang 0-2 panimula para palakasin ang tsansa sa eight-team quarterfinal round.
Nagtala si hometown idol Mark Barroca ng 21 points at 7 assists para pamunuan ang tropa ni coach Chito Victolero, habang may 19 markers, 17 rebounds at 2 assists si import James Farr.
Nalasap naman ng Meralco ang kanilang ikaapat na sunod na kamalasan sa kabila ng kinamadang 35 points, 10 boards at 4 assists ni import Delroy James.
Ang 32-anyos na European League veteran ang ikatlong reinforcement na ipinarada ni mentor Norman Black matapos sina Gani Lawal at Jimmie Lee Taylor.
Matapos itayo ng Hotshots ang 17-point lead, 32-15, sa pagtiklop ng first quarter ay nakadikit naman ang Bolts sa 54-58 sa 5:01 minuto ng third quarter.
Ngunit hindi isinuko ng Magnolia ang kanilang kalamangan at muling humataw sa final canto mula sa ipinosteng 20-point advantage, 91-71, sa huling 6:13 minuto galing sa baseline drive ni guard Jio Jalalon.
Samantala, lalabanan ng nagdedepensang Barangay Ginebra ang Alaska ngayong alas-6:45 ng gabi matapos ang laro ng San Miguel at Columbian sa alas-4:30 ng hapon sa Smart Araneta Coliseum.
- Latest