Batang Pier muling sumosyo sa liderato
MANILA, Philippines — Nang pumasok ang mga tirada ng mga bagong hugot na sina Kevin Ferrer, Sol Mercado at Jervy Cruz ay hindi maiwasang mangiti ni coach Pido Jarencio.
“Alam ko lahat ng kinuha namin ay makakatulong sa amin,” wika ni Jarencio.
Nakahugot ng double digits mula sa pitong players, pinabagsak ng Batang Pier ang Blackwater Elite, 127-99, para sumosyo sa liderato ng 2019 PBA Commissioner’s Cup kahapon sa Cuneta Astrodome sa Pasay City.
Kumolekta si Ferrer ng 23 points, 6 assists at 5 rebounds para sa pang-pitong panalo ng NorthPort sa walong laro at makatabla sa unahan ang TNT Katropa.
Nag-ambag naman si Sean Anthony ng 22 markers kasunod ang 16, 14 at 10 points sina Robert Bolick, Cruz, Mercado, import Prince Ibeh at Paolo Taha, ayon sa pagkakasunod.
Sina Mercado, Cruz at Ferrer ay mula sa nagdedepensang Barangay Ginebra bilang kapalit ni Stanley Pringle.
Nalasap ng Elite ang kanilang ikalawang sunod na kamalasan matapos umuwi sa US ang may injury na si import Alex Stepheson.
Mula sa 29-21 abante sa pagtiklop ng first quarter ay nag-init ang NorthPort sa second canto para ilista ang 44-28 kalamangan galing sa jumper ni Cruz.
Ang three-point shot ni Ferrer ang nagbaon pa sa Blackwater sa 69-102 sa 8:02 minuto ng laro.
Pinamunuan ni No. 2 overall pick Bobby Ray Parks, Jr. ang Elite mula sa kanyang 25 points.
- Latest