Ikalawang tsansa ng Raptors para sa titulo
OAKLAND, California - Dadalhin ang NBA Finals sa Oracle Arena sa pinakahuling pagkakataon.
Para sa Toronto Raptors, ito ang ikalawa nilang pagkakataon para mahablot ang kauna-unahang NBA championship.
Sa panig naman ng Golden State Warriors ay maglalaro sila para kay injured forward Kevin Durant at sa mga fans na kanilang maiiwan sa Oakland.
Nakatakda ang Game Six bukas (Manila time).
Dadalhin ng Raptors ang kanilang hawak na 3-2 kalamangan sa best-of-seven championship series nila ng Warriors.
At umaasa ang Toronto na hindi na mauulit ang nangyari sa Game Five kung saan naitayo nila ang isang six-point lead sa huling tatlong minuto bago ito naisuko sa Golden State.
Kumamada sina Thompson at Stephen Curry ng tatlong magkahiwalay na three-point shots para sa 106-105 paglusot ng Warriors at makabangon sa dalawang sunod nilang kabiguan sa Raptors.
“Come out and do the same thing. Just be mentally focused, try to limit our mistakes, and be the aggressor,” wika ni Toronto star forward Kawhi Leonard sa kanilang game plan sa Game Six. “Just play hard 48 minutes and see what happens.”
Alam naman ng Golden State na hindi na makakabalik sa serye si Durant at maging sa susunod na apat hanggang anim na buwan bunga ng kanyang natamong Achilles tendon injury sa Game Five.
Naglaro si Durant kahit na kagagaling lamang sa strained right calf injury na nagpaupo sa kanya ng halos isang buwan.
Hindi rin makukuha ng Warriors ang serbisyo ni back-up center Kevon Looney.
Kaya naman ang kanilang ‘fighting spirit’ ang sasandigan ng Golden State laban sa Toronto.
- Latest