‘Game fixing’ sa MPBL iimbestigahan
MANILA, Philippines — Makikipagtulungan ang Maharlika Pilipinas Basketball League sa isang expert group para maimbestigahan ang alegasyon ng ‘game fixing’ sa loob ng nasabing regional amateur basketball league.
Ang nasabing krusada ay pamumunuan mismo ni founder at chief executive officer Senator Manny Pacquiao.
Seryoso ang Senador na malaman ang katotohanan sa mga naririnig niyang ‘game fixing’ sa mga laro sa MPBL.
“Gusto kong pangalagaan ang MPBL. Gusto kong ang tao ay hindi niloloko. Gusto ko ang game laging competitive. Hindi ‘yung maraming hokus-pokus,” sabi ni Pacquiao.
“Ayaw kong niloloko natin ‘yung sambayanang Pilipino. Wina-warningan ko lang baka pagdating ng panahon mawala na kayo na parang bula,” dagdag pa ng Filipino world boxing champion.
May mga ‘unconfirmed reports’ na nakarating sa MPBL Commissioner’s Office ukol sa alegasyon ng ‘game fixing’.
Sinabi pa ni Pacquiao na bibigyan niya ng pabuya ang sinumang makakapagpatunay na may anomalya sa liga.
“May mga grupo na tayong expert diyan para magsubaybay sa mga players na kahina-hinala, mga taong pumapasok outside the league,” wika ni Pacquiao. “Bantayan natin sila. Magtulungan na lang tayo.”
- Latest