Gilas women’s 3x3 team sasagupa sa Australia sa quarterfinals
MANILA, Philippines — Swak na ang Gilas Pilipinas women’s 3x3 team sa quarterfinal round ng bigating 2019 FIBA 3x3 Asia Cup matapos pumangalawa sa Pool C kahapon sa Changsha, China.
Nagtapos sa 1-1 kartada ang Nationals para makasama ang Japan sa top two qualifiers mula sa Pool C papasok sa knockout quarterfinals na sisiklab ngayon.
Matapos walisin ang qualifying draw upang makapasok sa main draw ay nagulantang ang Gilas women’s squad.
Ito ay matapos silang tambakan ng paboritong Japan, 8-20, sa unang sabak.
Sa kabutihang palad ay nakabawi kaagad ang mga Pinay cagers nang ibuhos ang galit kontra sa Sri Lanka, 21-6 upang masiguro ang ikalawang puwesto sa Group C.
Nanguna sa nasabing atake ng Nationals sina Janine Pontejos, Afril Bernardino, Clare Castro at Jack Animam.
Dahil dito ay umabante sa knockout quarterfinals ang Gilas Pilipinas women’s team kontra sa bigating Australia.
Nakatakda ang laban ng mga Pinay at Aussies ngayong alas-12:10 ng tanghali.
Isa lamang ang FIBA Asia 3x3 Cup sa mga torneong sasalihan ng Gilas Pilipinas women’s team kasama na rin ang Jones Cup bilang bahagi ng paghahanda para sa nalalapit na 30th Southeast Asian Games na gaganapin sa bansa.
Hangad ng Nationals na maisukbit ang kanilang unang women’s title sa SEA Games kontra sa mga karibal na Indonesia, Malaysia at Thailand.
Magaganap ang nasabing biennial regional event mula Nobyembre 30 hanggang Disyembre 11 sa Mall of Asia Arena.
- Latest
