EJ magbabalik-aksyon para sa Tornadoes sa PSL All-Filipino Cup
MANILA, Philippines — Matapos ang dalawang taon na pamamahinga ay magbabalik-aksyon na si EJ Laure para sa Foton Tornadoes sa paghataw ng 2019 Philippine Superliga All-Filipino Conference na magsisimula sa susunod na buwan.
Pormal nang inihayag ng Tornadoes ang muling pagpasok ni Laure sa koponan kasama ang tatlo pang bagong miyembrong sina University of the Philippines standouts Justine Dorog at Marian Buitre, at UAAP Season 81 Best Setter Lai Bendong ng University of the East.
Makakasama ng tatlo ang magkapatid na sina Jaja Santiago at Dindin Santiago-Manabat na parehong galing sa overseas stint sa Japan Volleyball League.
Nasa line-up din ng Tornadoes sina Maika Ortiz, Ivy Perez, Christine Joy Rosario, Mina Aganon, Jen Reyes, Iumi Yongco, Carla Sandoval, Shaya Adorador, Elaine Kasilag at Gen Casugod.
Huling nakitang naglaro ang UAAP Season 77 Rookie of the Year awardee na si Laure noong 2017 PSL Grand Prix kung saan tumapos sa ikatlong puwesto ang Tornadoes.
Nagpahinga si Laure upang magpagaling ng kanyang shoulder injury na matagal din niyang ininda.
Sa pagbabalik ni Laure sa court ay inaasahang maglalaro na ulit siya para University of Santo Tomas sa Season 82 ng UAAP kasama ang nakababatang kapatid na si Eya – ang Season 81 Rookie of the Year at Second Best Outside Hitter.
Malaking tulong si EJ dahil magtatapos na ang playing year ni UAAP Season 81 MVP at First Best Outside Hitter Sisi Rondina.
- Latest