Beermen hari pa rin ng Philippine Cup
MANILA, Philippines — Sadyang hindi matatawaran ang puso ng isang kampeon.
Bumangon ang nagdedepensang San Miguel mula sa 17-point deficit sa third quarter para talunin ang Magnolia sa Game Seven, 72-71, at pagharian ang 2019 PBA Philippine Cup Finals kagabi sa Smart Araneta Coliseum.
Tuluyan nang isinara ng Beermen ang kanilang best-of-seven championship showdown ng Hotshots sa 4-3.
“Ito ay para sa lahat ng mga fans ng basketball,” sabi ni head coach Leo Austria.
Kumolekta si five-time PBA MVP June Mar Fajardo ng 31 rebounds, 17 points, 2 steals at 2 blocks.
Ito ang pang-limang sunod na All-Filipino crown ng San Miguel at ang ika-26 sa kabuuan sa 41 championship stint.
Nabigo naman ang Magnolia na makamit ang kanilang back-to-back title matapos pagharian ang 2018 PBA Governor’s Cup.
Mula sa maliit na 24-20 abante sa first quarter ay naghulog ang Hotshots ng 14-3 bomba para ilista ang 15-point lead, 38-23, laban sa Beermen sa 2:37 minuto bago ang halftime.
Pinuwersa ng Magnolia ang San Miguel sa 18 turnovers sa first half kung saan umiskor si Ian Sangalang ng 13 points.
Lalo pang pinalobo ng Hotshots ang kanilang kalamangan sa 43-26 sa pagsilip ng third period mula sa three-point shot at finger roll ni Mark Barroca.
Saglit na nakalapit ang Beermen sa 43-49 buhat sa pinakawalang 17-6 atake sa huling 2:23 minuto bago agawin ang unahan sa 72-71 mula sa fade away ni Alex Cabagnot sa huling 57.2 segundo ng laro.
Dalawang beses nagkaroon ng tsansa si Jio Jalalon na maipanalo ang Hotshots.
Ngunit sa huli ay namayani ang eksperyensa ng San Miguel.
- Latest