Lady Eagles reresbak sa Tigresses sa Game 2

MANILA, Philippines — Habang nakasakay sa alapaap ang buong komunidad ng University of Santo Tomas matapos makuha ang Game One ng UAAP Season 81 women’s volleyball tournament best-of-three championship series ay tahimik naman ang kampo ng Ateneo de Manila University.

Abala ngayon ang coa­ching staff ng Lady Eagles upang bumalang­kas ng solidong plano dahil desidido ang Katipunan-based squad na makaresbak at makapu­wersa ng rubber match sa kanilang serye.

Ayaw munang mag­sa­lita ni Ateneo mentor Oliver Almadro.

Nais niyang isentro ang atensyon sa pagbuo ng magandang plano upang muling makalipad ang Lady Eagles sa Game Two.

Tanging ang hiling ni­to ay panalangin na uma­­bot sa Game Three ang serye.

“Pray for us na may Game Three, mas ma­ganda kung may Game Three,” ani Almadro.

Depensa ang pangu­nahing tututukan ng Ate­neo partikular na kay UST ace at season MVP Sisi Rondina na bumulusok nang husto upang buhatin ang Tigresses sa 25-17, 25-16, 25-20 panalo sa series ope­ner noong Sabado.

Hirap ang Lady Eagles na pigilan ang 5-foot-6 outside hitter kung saan nagtala si Ron­dina ng kabuuang 23 points.

Dominado ng UST ang attack line matapos magtala ng 46 spikes kumpara sa 24 lamang ng Ateneo, habang nakakuha rin ang Tigres­ses ng 10-1 edge sa service area.

Kailangan ng Lady Eagles ng solidong laro mula kina middle hitter Maddie Madayag at Bea De Leon na siyang magba­ban­tay kay Ron­di­na.

Tanging si opposite hitter Kat Tolentino lamang ang nakagawa ng double figures para sa Ateneo tangan ang 12 hits, habang nagkasya si­na Madayag at De Leon sa pinagsamang 10 markers, walo naman galing kay Jules Samonte at isa mula kay Ponggay Gaston.

Alam ni Tigresses head coach Kungfu Re­yes na reresbak ang La­dy Eagles.

Ngunit handa itong tapatan anumang bombang ibabato ng Ateneo.

“We’ll immediately get back to the drawing board,” ani Reyes.