Gilas women magpaparada ng Fil-Ams
MANILA, Philippines — Hindi magpapahuli ang Gilas Pilipinas women’s team, dating kilala bilang Perlas Pilipinas, sa men’s national squad para sa misyong makasabay din sa international basketball stage.
Ito ay matapos kumuha rin ng naturalized player ang Gilas Pilipinas women’s team sa katauhan ni Kelli Hayes.
Noong nakaraang buwan pa dumating sa bansa ang Filipino-American na si Hayes at nakasama ang Gilas Pilipinas women’s squad sa training camp at team building na ginanap sa Taiwan noong nakaraang linggo.
“She’s very intelligent. Mas may experience siya kumpara sa mga locals natin. Malaking tulong si Kelli sa national team,” wika ni Gilas Pilipinas women’s program director at head coach Pat Aquino.
Dating US NCAA Division I player si Hayes para University of California-Los Angeles kaya’t siguradong madadala sa koponan ang karanasan at international brand of play.
Maliban kay Hayes, may tatlo pang Filipino-American players na inaabangan si Aquino na darating ngayong buwan.
Ito ay sina Meilyn Bautista ng George Washington University, Gabi Bade ng Sacramento State at Arnecia Hawkins ng Arizona State.
“We still have three more Fil-Ams arriving to reinforce the squad,” sabi ni Aquino. “I’m just happy that foreign-based Filipino cagers are already showing interest in playing for the country.”
Makakasama ng mga Fil-Am reinforcements sa Gilas Pilipinas women’s team ang mga mainstays na sina reigning UAAP Most Valuable Player Jack Animam, Afril Bernardino at Janine Pontejos.
Ayon kay Aquino, pinalakas nila ngayon ang Gilas Pilipinas women’s squad na handa nang makipagsabayan sa mga karibal lalo na sa nalalapit na 2019 Southeast Asian Games dito sa bansa sa Nobyembre.
“I don’t want to promise anything. I don’t want to predict winning the gold but definitely, we’ll be stronger this coming SEAG,” pagtatapos ni Aquino.
Taliwas sa Gilas Pilipinas men’s team na 17 beses nang naghahari sa SEA Games, wala pang kampeonato ang mga Pinay dribblers na siyang hahangarin nilang masungkit ngayong taon.
- Latest
