SMBeer, Magnolia agawan sa 3-2 lead

MANILA, Philippines — Anim na Beermen ang tumapos sa double fi-gures, kasama ang 31 points ni five-time PBA MVP June Mar Fajardo, sa kanilang panalo sa Game Four noong Miyerkules.

Ang ganitong laro ang gustung-gustong makita ni coach Leo Austria sa four-time PBA Philippine Cup champions.

“What I like with our team is the energy, focus, and pride. Iyon ang umiiral sa kanila ngayon,” sabi ni Austria matapos ang 114-98 panalo ng San Miguel kontra sa Magnolia. “It’s a team effort and everybody was so focus.”

Pipilitin ng Beermen na makalapit sa kanilang inaasam na ika-25 korona sa pagsagupa sa Hotshots ngayong alas-7 ng gabi sa Game Five ng 2019 PBA Philippine Cup Finals sa Smart Araneta Coliseum.

Nakaiwas ang San Miguel na mabaon sa 1-3 pagkakalugmok sa kanilang best-of-seven championship series ng Magnolia.

Mula sa malamyang 4-of-11 fieldgoal shooting ni Fajardo sa 82-86 kabiguan ng Beermen sa Hotshots sa Game Three ay nagposte ang Best Player of the Conference ng halos perpektong 13-of-14 clip sa Game Four.

“We need to do a good job next time on June Mar sa poste,” wika ni Magnolia mentor Chito Victolero sa 6-foot-10 na Cebuano star center. “Almost 100 percent yata ‘yung field goal niya.”

Ngunit hindi lamang si Fajardo ang dapat tutukan ni Victolero kundi maging sina Terrence Romeo, Chris Ross, Christian Standhardinger, Arwind Santos at Alex Cabagnot na umiskor ng 18, 15, 13, 12 at 11 points, ayon sa pagkakasunod sa Game Four.

“Iyong aming depensa, hindi ganon ka-aggressive. We need to adjust. We need to be more aggressive than San Miguel,” dagdag ni Victolero.

Ang panalo ng Magnolia ang maglalapit sa kanila sa pag-angkin sa ika-15 korona.