F2 vs Petron: Matira Matibay

MANILA, Philippines – Mas matinding bakbakan ang asahan sa pagitan ng reigning champion Petron at F2 Logistics sa pagsambulat ng rubber match ng Philippine Superliga Grand Prix best-of-three finals series ngayong gabi sa The Arena sa San Juan City.

Magpapang-abot ang Blaze Spikers at Cargo Movers sa alas-7 ng gabi.

Nakauna ang F2 Logistics nang itarak nito ang 25-20, 16-25, 25-23, 25-23 panalo sa Game 1 noong Martes ngunit pumanig sa Petron ang momento matapos kubrahin ang 23-25, 25-23, 25-14, 25-19 sa Game 2 para maitabla ang serye.

“We accepted Game 1 as a challenge. It was a wakeup call. After losing in Game 1, we had an open forum where we allowed everybody to express their feelings,” ani Petron coach Shaq Delos Santos.

Kumuha ng malakas na puwersa ang Blaze Spikers kina American super imports Katherine Bell at Stephanie Niemer na siyang nagsanib-puwersa para buhatin ang tropa sa Game 2.

Humataw si Bell ng 25 puntos at 24 digs habang nagtala naman si Niemer ng 23 hits at 20 digs.

Malaki rin ang naitulong ng local players partikular na si Mika Reyes na kumana ng 13 puntos tampok ang apat na blocks at sina Aiza Maizo-Pontillas at Remy Palma na may pinagsamang 11 markers, at Rhea Dimaculangan na nagrehistro ng 29 excellent sets.

“We had an open forum where we allowed everybody to express their feelings. We have to release all of those so we can feel the presence of each other. I’m glad that everybody stepped up and was on the same page all throughout the match,” dagdag ni Delos Santos.

Mas solidong gameplan ang ilalatag ng Petron para masigurong hindi makawala sa kanilang kamay ang kampeonato.

Isa sa mga tututukan nito ang mabagal na simula ng Blaze Spikers.