Curry pinag-init ang Golden State

OAKLAND, California — Humataw si Stephen Curry ng 38 points at nagsalpak ng walong three-pointers na pinakamarami sa postseason history para pamunuan ang top-seeded Golden State Warriors sa 121-104 paggupo sa bisitang Los Angeles Clippers sa kanilang playoff opener.

Dahil sa intensidad ay nagkaroon ng girian sina Warriors forward Kevin Durant at Clippers guard Patrick Beverley.

Parehong pinatalsik sa laro sina Durant at Beverly sa huling 4:41 minuto ng fourth period 19 segundo matapos silang matawagan ng double-technicals.

Nilampasan naman ni Curry si Ray Allen (385) para sa career postseason triples sa kanyang bagong record na 386.

Kumalawit din siya ng postseason career-high na 15 rebounds, 7 assists.

Nakatakda ang Game 2 bukas (Manila time) sa Oracle Arena.

Nagdagdag si Draymond Green ng 17 points, 7 assists at 7 rebounds, habang umiskor si Durant ng 23 points para sa pang-pitong sunod na postseason win ng Warriors.

Tumipa si Montrezl Harrell ng 26 points kasunod ang 25 markers ni reserve Lou Williams sa panig ng Clippers.

Sa Philadelphia, tumipa si guard D’Angelo Russell ng 26 points habang may 23 markers si Caris LeVert para akayin ang Brooklyn Nets sa 111-102 panalo laban sa 76ers sa Game 1 ng kanilang Eastern Conference first-round playoff series.

Pinangunahan naman ni Jimmy Butler ang Philadelphia sa kanyang 36 points.

Sina 76ers starters Ben Simmons, Tobias Harris at JJ Redick ay naglista ng pinagsamang 11-of-31 fieldgoals shooting para sa kanilang 18 points.

Sa Denver, naglista si DeMar DeRozan ng 18 points at nakagawa si Derrick White ng key steal sa dulo ng final canto para sa 101-96 panalo ng San Antonio Spurs kontra sa Nuggets sa Game One ng kanilang playoff series.

Naagaw ni White ang bola sa midcourt mula kay Jamal Murray sa hu-ling 1.3 segundo matapos ang dalawang free throws ni LaMarcus Aldridge para sa abante ng Spurs.

Naglalaro ang San Antonio sa kanilang ika-22 sunod na playoff appearance dala ang bagong mga players, kabilang si DeRozan na nagmula sa Toronto Raptors sa Kawhi Leonard trade.