Manuel hindi na naman makakalaro para sa Alaska
MANILA, Philippines – Naurong ulit ang pagbabalik sana ni Vic Manuel para sa kampanya ng Alaska sa 2019 PBA Philippine Cup.
Ito ay matapos muling mapilayan ang kanyang dating back injury na siyang dahilan ng hindi niya paglalaro sa torneo.
Nakatakda na sanang magbalik si Manuel sa huling laro ng Aces kontra sa NorthPort Batang Pier ngayong hapon bago madale ng parehong injury sa kanyang pagbabalik sa ensayo noong nakaraang Biyernes.
“Negative ako kasi nasaktan ako last Friday,” sabi ng 6-foot-4 na si Manuel. “Natamaan ako eh. Medyo malakas iyong tama.”
Bunsod nito, kung sakaling makapasok ang Alaska sa quarterfinals kung mananalo sa NorthPort ay posibleng hindi pa rin makakasama ng tropa ni coach Alex Compton ang big man na si Manuel.
“Kahit iyong quarterfinals, mukhang negative na. Sayang. Okay na sana ako eh, natamaan pa.”
Kagagaling lang ni Manuel sa pambihirang season noong 2018 kung kailan naging top Best Player of the Conference candidate pa siya sa Commissioner’s Cup.
Sa Governors’ Cup ay nagrehistro siya ng 16 points at 5 rebounds para sa Aces bago nadale ng naturang injury na ininda ng Alaska tungo sa 2-4 kabiguan sa PBA Finals series kontra sa nagkampeon na Magnolia.
Ayon kay Manuel, gigil na gigil na siyang makatulong ulit sa Aces pero dahil sa back injury ay mukhang sa next conference niya na magagawa iyon.
“Mukhang sa next conference na lang,” ani Manuel. “Masakit eh. Gustung-gusto ko talagang maglaro, gigil na gigil na. Pero hanggang gigil na lang muna. Wala tayong magagawa.”
Hawak ang 4-6 baraha, hangad ng mga bataan ni Compton ang mahalagang panalo upang makatiyak ng upuan sa eight-team quarterfinals na magsisimula sa unang linggo ng Abril.
- Latest