Jazz pinalubog ang Phoenix Suns
SALT LAKE CITY -- Umiskor si Phoenix Suns guard Devin Booker sa halos lahat ng bahagi ng court.
Ngunit mas naging agresibo si Utah Jazz center Rudy Gobert sa loob ng shaded lane.
Nagsalpak si Gobert ng season-high 27 points at nagposte ng single-season NBA dunk record para pamunuan ang Jazz sa 125-92 paggupo sa Suns.
Nakakuha ang Phoenix ng 59 points mula kay Booker.
“I’m not rushing like I used to and my teammates are doing a great job finding me. When I’m able to finish and draw fouls, it gives them more confidence to pass me the ball,” pahayag ni Gobert.
Ang alley-oop off ni Gobert mula sa lob pass ni Donovan Mitchell sa second quarter ang ika-270 dunk sa season ng 7-foot-1 center.
Ang 275 dunks ni Gobert ang pinakamarami sa NBA sapul nang simulan ang statistic noong 2000 para sapawan ang 269 slams ni Dwight Howard noong 2007-08.
Nag-ambag naman sina Derrick Favors at Ricky Rubio ng tig-18 points, habang may 14 markers si Joe Ingles para sa pang-pitong panalo ng Utah sa huli nilang walong laban.
Sa Memphis, kumamada si Bruno Caboclo ng career-high na 24 points at nagdagdag si Tyler Dorsey ng 21 markers para akayin ang Grizzlies sa 115-103 paggupo sa Oklahoma City Thunder.
Tumapos naman si Delon Wright na may 18 points at career-best 13 assists para sa Memphis, nakahugot kay Jonas Valanciunas ng 18 points at 14 rebounds.
Binanderahan ni Paul George ang Thunder mula sa kanyang 30 points at 12 rebounds kasunod ang 25 markers ni Dennis Schroder.
Sa Orlando, tumipa si Nikola Vucevic ng 28 points at 11 rebounds at pinatahimik ng Magic ang Philadelphia 76ers sa loob ng 12 minuto patungo sa kanilang 119-98 panalo.
Sa Portland, humakot si big man Jusuf Nurkic ng 32 points at 16 rebounds bago nagkaroon ng left leg injury sa ikalawang overtime para sa 148-144 pagtakas ng Trail Blazers kontra sa bisitang Brooklyn Nets.
- Latest
