Balak rumesbak ng Lady Spikers

MANILA, Philippines — Makaresbak ang target ng nagdedepensang De La Salle University sa pagharap nito sa University of the Philippines sa pagpapatuloy ng UAAP Season 81 women’s volleyball tournament ngayong hapon sa Antipolo Sports Center sa Antipolo.

Magkukrus ang landas ng Lady Spikers at Lady Maroons sa alas-4 matapos ang bakbakan ng Far Eastern University at Adamson University sa alas-2.

Nakahimpil sa No. 2 spot ang La Salle hawak ang 5-2 baraha sa ilalim ng nangungunang Ateneo de Manila University na may 7-1 marka.

Magkasalo naman sa ikaapat na puwesto ang UP at FEU na may magkatulad na 4-3 kartada.

Yumuko ang La Salle sa UP, 25-21, 20-25, 21-25, 25-20, 12-15 sa kanilang unang pagtatagpo noong Marso 2.

Kaya naman gigil na makabawi ang Lady Spi-kers na babanderahan ni super rookie Jolina Dela Cruz kasama sina outside hitters May Luna at Tin Tiamzon, middle blockers Des Clemente at Aduke Agunsanya, at playmaker Michelle Cobb.

Sa kabilang banda, inaasahang muling gagamitin ng Lady Maroons ang parehong formula upang maduplika ang kanilang first-round win sa Lady Spikers.

Nagbida sa naturang panalo si dating Rookie of the Year awardee Isa Molde na pumalo ng 20 puntos mula sa 17 attacks at tatlong blocks katuwang si Diana Mae Carlos na nagdagdag naman ng 19 markers.

Sasandalan din ng tropa si veteran setter Ayel Estanero gayundin sina middle blockers Ai Gannaban at Maristela Layug at wing spiker Justine Dorog.

“We are motivated, working hard every day so we can keep the team together. We will give our all this second round,” ani Estanero.

Lumasap ng mapait na 17-25, 25-14, 25-17, 23-25, 15-17 kabiguan ang UP sa National University.

Subalit mabilis itong nakabalik sa porma matapos pabagsakin ang Adamson, 25-27, 25-14, 25-12, 25-21.