Balik na si Renaldo Balkman sa Alab Pilipinas
MANILA, Philippines – Sa pagbabalik ni Renaldo Balkman mula sa injury, tiyak na pangungunahan ng Puerto Rican import ang nagdedepensang San Miguel-Alab Pilipinas sa kanilang ikaapat at huling pagharap sa Macau Black Bears ngayon sa pagpapatuloy ng 9th Asean Basketball League (ABL) sa Foshan International Sports and Cultural Center, Macau, China.
Tangan ang 18-5 win-loss slate, haharapin ng Alab Pilipinas ang Black Bears sa alas-7:30 ng gabi kung saan angat ang Filipino team sa 2-1 sa kanilang unang tatlong paghaharap sa season na ito.
Unang tinalo ng tropa ni coach Jimmy Alapag ang Black Bears, 106-99 noong Enero 18 sa Filoil Flying V Center at sinundan ng 101-96 panalo noong Marso 8 sa parehong venue. Ang tanging talo ng Alab Pilipinas sa Chinese team ay 103-116 sa University of Macau gym noong Pebrero 27.
Nagkaroon ng concussion si Balkman matapos ang banggaan nina Fil-Am Michael Mckinney sa kanilang laban ng Black Bears noong Biyernes kaya wala siya nang matalo ang Alab Pilipinas sa Formosa Dreamers, 71-79 noong Linggo sa Taiwan.
Hindi pa tiyak kung maglalaro na ang ibang nasa injury list na sina Lawrence Domingo (knee), Caelan Tiongson (ankle) at Brandon Rosser (knee) kaya inaasahang mag-i--step up din sina 7’3 Puerto Rican import PJ Ramos, John Urbiztondo, Bobby Ray Parks Jr. Ethan Alvano, Prince Rivero, Chris Sumalinog at Nico Javelona.
“I’m not worried about injury. That’s part of it. Injuries happen anytime. I think it’s better that it happens now than in the playoffs. We still got a few weeks before the playoffs. I’m sure they can be ready for the playoffs,” sabi ni Ramos.
- Latest
