Di naawat si Curry

PHILADELPHIA — Bagama’t nalagay sa foul trouble ay hindi ito na-ging sagabal kay Stephen Curry para ipanalo ang Golden State Warriors sa pagtipa ng limang three-pointers para tumapos na may 28 points sa 120-117 pagresbak ng Warriors kontra sa 76ers.

“We’re getting on this six-hour flight with smiles on our faces,” sabi ni Curry. “These feel good, these games where you figure out how to win in a playoff atmosphere.”

Naglaro lamang si Curry sa loob ng 3:45 minuto sa third quarter dahil sa pagkakalagay sa foul trouble.

Ngunit sa kanyang pagpasok sa fourth period ay nagsalpak si Curry ng 3-pointer para sa 111-109 abante ng Warriors at iniskor ang sumunod na anim na puntos ng Golden State sa huling 2:35 minuto para tuluyan nang makalayo sa Phildelphia.

Nagpasabog naman si Kevin Durant ng 34 points habang may 25 markers si DeMarcus Cousins para tapusin ang two-game road losing skid ng Warriors.

Naglaro ang 76ers na wala si franchise star center Joel Embiid sa pang-limang sunod na pagkakataon bunga ng kanyang namamagang kaliwang tuhod.

Sa Denver, humataw si Jrue Holiday ng 29 points kasunod ang 28 markers ni Julius Randle para pamunuan ang New Orleans Pelicans sa 120-112 pagdaig sa Nuggets.

Bumangon ang New Orleans mula sa 19-point deficit sa first half para balikan ang Denver.

Nag-ambag si Frank Jackson ng 16 points para sa Pelicans, naglaro nang wala sina Anthony Davis (rest) at E’Twaun Moore (thigh).

Tumipa sina Nikola Jokic at Jamal Murray ng tig-20 points para sa Nuggets.

Sa Salt Lake City, kumamada si Donovan Mitchell ng career-high 46 points para ibangon ang Utah Jazz mula sa 17-point fourth-quarter deficit at ilusot ang 115-111 panalo kontra sa Milwaukee Bucks.

Tumapos naman si Giannis Antetokounmpo na may 43 points at 14 rebounds sa panig ng Bucks.

Sa Dallas, kumolekta si Jonas Valanciunas ng 20 points at 10 rebounds, habang umiskor si Joakim Noah ng 12 points para tulungan ang Memphis Grizzlies sa 111-91 panalo kontra sa Mavericks.