Golden State natakasan ang Sacramento

OAKLAND, Calif. — Nagpasabog si star guard Stephen Curry ng 36 points, tampok ang 10 three-pointers para pamunuan ang Golden State Warriors sa 125-123 pagtakas laban sa bisitang Sacramento Kings.

Naglista naman si Kevin Durant ng 28 points, 9 rebounds at pinantayan ang kanyang career-high na 7 blocks habang kumolekta si DeMarcus Cousins ng 17 points at 10 rebounds laban sa dati niyang tropa.

Tumipa si Curry ng 11 points sa fourth quarter para ilayo ang Warriors laban sa Kings.

Mula sa 123-117 bentahe ng Golden State sa huling 25.5 segundo sa final canto ay nakalapit ang Sacramento sa 123-125 mula sa back-to-back triples ni Buddy Hield.

Matapos ang mintis na dalawang free throws ni Andre Iguodala para sa Warriors ay kapos naman ang tangkang tres ni Hield sa huling posesyon ng Kings.

Ito ang ikaapat na sunod na panalo ng Golden State laban sa Sacramento ngayong season.

Sa Los Angeles, umiskor si LeBron James ng 29 points samantalang nagdagdag si Brandon Ingram ng 27 markers para pangunahan ang Lakers sa 111-106 paggiba sa Houston Rockets.

Bumangon ang Los Angeles mula sa 19-point deficit sa third quarter para balikan ang Houston, nakahugot kay James Harden ng 30 points, 10 rebounds at 9 assists bago na-foul out sa huling 1:24 minuto ng fourth period.

Nag-ambag si guard Chris Paul, nakuha ang kanyang ikaanim at huling foul, ng 23 points para sa Rockets.

Sa Milwaukee, humugot si Giannis Anteto-kounmpo ng 12 sa kanyang 30 points sa fourth quarter at nagsalpak si Khris Middleton ng isang 3-pointer sa dulo ng laro para igiya ang NBA-leading Bucks sa 98-97 paglusot sa Boston Celtics.

Nabigo si Kyrie Irving, tumapos na may 22 points, na maipanalo ang Boston mula sa kanyang mintis na salaksak sa pagtunog ng final buzzer.

Sa Cleveland, nagsumite si Cedi Osman ng 19 points at nagposte si Kevin Love ng 16 points at 11 rebounds para akayin ang Cavaliers sa 111-98 panalo laban sa Phoenix Suns.

Nalasap ng Suns ang kanilang franchise-record na pang-16 sunod na kamalasan.