Colts vs Fillies sa PHILRACOM 3YO race

MANILA, Philippines — Ilalarga sa Linggo ang 2019 PHILRACOM “3-Year-Old Local Fillies & Colts” na gaganapin sa Metro Turf Club Inc. sa Malvar, Batangas.

Ito ang unang karera sa mga minor races na ilalarga.

Anim ang nominado kung saan 52 kgs. ang magiging timbang na dadal­hin ng Fillies habang 54 kgs. ang sa Colts.

Ang mga nominado sa nasabing karera ay sina Cat’s Day, Lakan Takhan, My Jopay, Serafina, Toy For The Bigboy at Turns Gold.

Gayunpaman, hindi pa sigurado na lahat sila ay kasali at  posibleng may hindi makakatakbo paglabas ng opisyal na programa ng karera.

Nakataya ang P300, 000 premyo sa unang kabayong tatawid ng meta. May P112,500 naman ang second placer habang ibubulsa ng tersero at pang-apat ang P62,500 at P25,000 ayon sa pagkakasunod.

Sa distansyang 1,400 meter ilalarga ang karera at inaasahang magandang laban ang masisilayan ng mga karerista.