E-Painters No. 1 na

MANILA, Philippines — Kasabay ng pagpapalasap sa Phoenix ng kauna-unahan nitong kabiguan ay inagaw ng Rain or Shine ang solong liderato.

Nakakuha ng double figures mula sa limang players at mahalagang drive ni big guard Mark Borboran sa huling 12.1 segundo, tinalo ng Elasto Painters ang Fuel Masters sa overtime, 98-94 sa 2019 PBA Phi-lippine Cup kahapon sa Smart Araneta Coliseum.

Umiskor sina big man Beau Belga at guard Kris Rosales ng tig-16 points para sa ikatlong sunod na ratsada ng Rain or Shine kasunod ang 13, 12 at 10 markers nina Maverick Ahanmisi, Raymond Almazan at Rey Nambatac, ayon sa pagkakasunod.

Kumolekta din ang 6-foot-6 na si Belga ng 9 rebounds at 7 assists.

“We just hit the big shots in the end. The nice thing about our win today is that just the way we want it,” sabi ni coach Caloy Garcia.

Ito naman ang unang pagkatalo ng Phoenix makaraang iposte ang franchise-best na 5-0 panimula.

Kinuha ng Elasto Painters ang four-point lead, 96-92,mula sa dalawang free throws ni Almazan sa nalalabing 53.9 segundo ng extra period. Nakadikit naman ang Fuel Masters sa 94-96 galing sa scoop shot ni guard Alex Mallari sa huling 35.5 segundo.

Ang pagtakas ng 6’4 na si Borboran sa depensa nina Jason Perkins at Calvin Abueva ng Phoenix ang nag-angat sa Rain or Shine sa 98-94 sa natitirang 12.1 segundo ng bakbakan.

“Talagang iniikot namin ‘yun bola para makuha namin ‘yung sistema,” sabi ng 6-foot-6 na si Belga, humakot din ng 9 rebounds at 7 assists, para sa Elasto Painters, inilista ang 14-point advantage, 70-56 sa huling 1:07 minuto ng third period.

Ganap namang naagaw ng Fuel Masters ang 77-75 abante sa 4:16 minuto ng fourth quarter bago dinala ni Perkins ang laro sa extra period, 87-87.