Perpetual kampeon sa men’s at juniors

MANILA, Philippines – Nalusutan ng University of Perpetual Help System Dalta ang matinding hamon ng College of Saint Benilde nang itarak nito ang 23-25, 25-17, 25-17, 25-23 panalo upang matamis na kubrahin ang ikalawang sunod na kampeonato kahapon sa NCAA Season 94 men’s volleyball tournament sa The Arena sa San Juan City.

Matikas na naasahan ng Altas si Season at Finals MVP Joebert Almodiel na kumana ng 19 puntos tampok ang 17 attacks gayundin si Ridzuan Muhali na kumana ng 19 hits at 11 digs.

“Gusto ko lang tala-gang makatulong sa teammates ko at sa coaches ko na makuha namin yung title. Sabi ko lang sa teammates ko na maging confident at composed sa laro,” ani Almodiel.

Nag-ambag naman sina Best Middle Blocker awardee Ronniel Rosales at John Patrick Ramos ng tig-siyam na puntos para sa Perpetual Help na nailista ang kanilang ika-12 kabuuang titulo sa liga.

Winalis ng Altas ang best-of-three series, 2-0, matapos manaig sa Game 1 noong nakaraang linggo sa bisa ng pahirapang 23-25, 25-19, 23-25, 25-23, 15-12 panalo.

“Sweep namin yung series pero hindi yun ganun kadali. Marami kaming pinaghirapan para makaabot dito. I urged them to stay calm inside the court,” ani Perpetual Help coach Sammy Acaylar.

Sa juniors, nakumpleto ng Perpetual Help ang five-peat matapos igupo ang Colegio de San Juan de Letran, 25-19, 30-28, 25-17, sa Game 2 ng best-of-three finals.

Nagtala si Noel Kampton ng 21 puntos habang nagdagdag naman sina skipper Kirth Patrick Rosos at Hero Austria ng tig-10 hits para tulungan ang Junior Altas na makuha ang ika-11 kabuuang korona.

Sa women’s division, napigilan ng nagdedepensang Arellano University ang selebrasyon ng Perpetual Help para sa triple crown matapos kubrahin ang 23-25, 25-9, 25-18, 22-25, 15-12 panalo sa Game 2 upang maipuwersa ang rubber match sa kanilang sari-ling best-of-three championship showdown.

Naitabla ng Lady Chiefs ang serye sa 1-1 kung saan nakuha ng Lady Altas ang Game 1 noong nakaraang linggo, 21-25, 25-17, 25-21, 25-20.