Magbabalik-aksiyon na si Terrence Romeo

MANILA, Philippines — Madadagdagan ang puwersa ng San Miguel Beer na may misyong makabalik agad sa winning column ng 2019 Philippine Basketball Association (PBA) Phi-lippine Cup ngayon kontra sa Rain or Shine sa Ynares Sports Center sa Antipolo City.

Babalik na kasi ang alas nitong si Terrence Romeo upang tulungan ang Beermen na maipagpag ang masaklap na 93-104 kabiguan noong nakaraang linggo kontra sa dating koponan niyang Talk ‘N Text.

Kinumpirma ito mismo ni head coach Leo Austria sa isang panayam kahapon.

“Yes, lalaro na si Terrence Romeo pero si Alex Cabagnot, hindi pa,” aniya sa isang text message.

Tatlong laro nang nakaliban si Romeo simula nang madale ng left ankle sprain sa unang laro niya kasama ang Beermen kontra sa Columbian Dyip na sinilat sila noong Enero 18, 118-124.

Labing dalawang minuto lamang nakapag-laro si Romeo sa naturang laban para sa pitong puntos at limang assists bilang kanyang SMB debut matapos i-trade ng TNT kapalit nina Brian Heruela, David Semerad at future draft pick bago magsimula ang 44th PBA Season.

Hindi nakapaglaro si Romeo sa dalawang panalo ng SMB kontra sa Ginebra, 99-91 at sa Meralco, 105-93 gayundin sa 93-104 kabiguan nila kontra sa TNT.

Bagama’t makakalaro na si Romeo, hindi pa makakasama ng Beermen ang isa pang top guard na si Alex Cabagnot na may iniinda pa ring hamstring injury bukod pa sa pagsailalim sa nasal reconstructive surgery noong nakaraang buwan.

Makakasama ni Romeo ang mga mainstays na sina five-time Most Valuable Player June Mar Fajardo, Arwind Santos, Christian Standhardinger, Chris Ross at Marcio Lassiter.