PVL All Stars sa Peb. 2 na

MANILA, Philippines — Babanderahan nina Alyssa Valdez ng Creamline Cool Smashers at Myla Pablo ng Motolite ang 2019 Premier Volleyball League All-Star Event na idaraos sa Pebrero 2 sa The Arena sa San Juan City.

Layunin ng liga na makalikom ng pondo para sa mga charity events nito kasabay na rin ng magbibigay saya at pasasalamat sa libu-libong tagahanga nito na walang tigil sa suporta sa mahigit isang dekadang pagtataguyod ng liga.

“This is our gift to the fans as well as raising funds for charity,” ani PVL official Ricky Palou.

Makakasama ng reigning PVL Open Conference MVP na si Valdez sa koponan sina Ateneo de Manila University standouts Deanna Wong, Maddie Mada-yag at Dani Ravena at Petro Gazz players Chie Saet at Jessie de Leon.

Kasama rin sina Michele Gumabao, Melissa Gohing at Risa Sato ng Creamline; Nicole Tiamzon at Kathy Bersola ng BanKo-Perlas; Grazielle Bombita ng Iriga-Navy; at  Isa Molde ng University of the Philippines.

Mamanduhan ang tropa ni Valdez ni Petro Gazz mentor Jerry Yee.

Aariba naman si Pablo katuwang sina Jia Morado at Jema Galanza ng Creamline; Jem Ferrer at Joy Dacoron ng BanKo-Perlas; Kat Tolentino, Vanessa Gandler at Bea de Leon ng Ateneo; Jonah Sabete at Cherry Nunag ng PetroGazz; Dimdim Pacres ng Tacloban; Dell Palomata ng Pocari-Air Force; at Thang Ponce ng Adamson-Akari.

Si Ateneo coach Oliver Almadro ang tatayong mentor ng tropa.

Bago ang all-star game na lalarga sa alas-4 ng hapon, magkakaroon ng autograph signing at skills games para sa mga fans.