PBA Press Corps
Maraming Pinoy ang nagkakamali sa pagbigkas sa English word na “corps” na korp o korps. Yung iba ay napapagkamalan pa itong abbreviation ng corporation.
Ganoon din sa samahan ng mga sportswriters na kumo-cover sa PBA – ang PBA Press Corps. Marami ang nagkakamaling sa pag-pronounce nito sa Filipino way, kaya nagiging masama sa pandinig – “corpse” na ang ibig sabihin ay bangkay.
Pero tatlumpung-taon na ang lumipas simula nang ito ay itinatag ay hindi pa “corpse” ang grupo na sumusunod sa laro ng PBA at naghahatid ng thrill at drama sa kanilang mga readers.
Alive and kicking @30 at patuloy na ginagawa ang duties and responsibilities para sa kani-kanilang mga nere-represent na news outfits.
Malaking selebrasyon ang naganap kagabi dahil isinagawa ang silver anniversary ng annual PBA Press Corps Awards Night.
Ipinagmamalaki ng sportswriter na ito na nasundan ko ang lahat ng kaganapan simula nang unang ihatid ng Press Corps ang annual awards noong 1993 sa Doña Nena’s Restaurant sa Quezon City.
Proud din ako na inabot ko ang mga naunang miyembro ng grupo na puno ng ideya ang mga kaisipan. Nariyan si Rickie Santos na ‘di naglaon ay naging PBA deputy commissioner at sina Chito Dela Vega, Rocky Nazareno, Dodo Catacutan, Tito Talao, Rey Lachica, Beth Repizo na lahat ay grumadweyt sa pagiging editor.
Malaki rin ang naging ambag nina Willie Caballes, Zean Macamay at Barry Pascua bago pumanaw.
Malalim na ang panahon na iginugol sa broadcast pero nananatili pa rin aktibo sa grupo si Zaldy Perez. At patuloy na nakamasid sa takbo ng PBA ang mga beteranong sina Noli Cortez, Abac Cordero, Musong Castillo, Fidel Mangonon, Gerry Ramos, Clyde Mariano at Eddie Alinea.
Sa mahabang panahon, nagsilbing press corps treasurer (at siyempre muse) ang PM sports editor na si Mae Balbuena.
Sigurado akong hindi maitatatwa ng PBA ang malaking kuntribusyon ng mga sportswriters na ito sa liga. Kasama sa kumiliti ng mga imahinasyon ng PBA fans ang kanilang magagaling na lenggwahe at pagsusulat.
- Latest
