Grabe ka Pacquiao! Broner ‘di nakaporma

LAS VEGAS – Hindi naibigay ni Manny Pacquiao ang knockout win na gustong makita ng kanyang mga fans, ngunit ipinakita naman niya ang pagdomina kay Adrien Broner bilang isang 40-anyos na world champion.

Sa harap ng 13,025 fans sa loob ng MGM Grand ay tinalo ni Pacquiao si Broner via una-nimous decision para mapanatiling suot ang WBA welterweight crown.

 Ang nasabing WBA welterweight belt ay inagaw ni Pacquiao kay Lucas Matthysse ng Argentina via seventh-round TKO win noong Hulyo sa Kuala Lumpur.

Iniskoran nina judges Tim Cheatham at Glenn Feldman ang laban sa magkatulad na 116-112 habang nagbigay naman si Dave Moretti ng 117-111 – lahat para kay Pacquiao.

Gustong patunayan ng Filipino world eight-division champion na maibibigay pa rin niya ang hinahanap na aksyon ng kanyang mga fans.

“I proved in my last fight against Matthysse and now I proved it again. The Manny Pacquiao journey will still conti-nue,” sabi ni Pacquiao.

Ilang beses nasaktan ni Pacquiao si Broner at tila gusto nang pabagsakin si Broner kundi lamang siya binalaan ni trainer Buboy Fernandez ukol sa counter-punches ng American challenger.

“Although I wanted to be more aggressive, my camp told me not to be careless and to just counter him and wait for opportunities. My trainer said, ‘Don’t be careless. Wait for him, counter,’ and that’s what I did,” wika ni Pacquiao.

 Muntik nang mapatumba ni Pacquiao si Broner sa ninth round.

“There was a round that I wanted to finish him. But Buboy said, ‘Be aggressive but don’t be careless,’” dagdag ni Pacquiao.

 Ito ang ika-61 pa-nalo ni Pacquiao, habang nalasap naman ni Broner ang pang-apat niyang kabiguan.

 Sinabi ni Sean Gibbons, isa sa mga handlers ni Pacquiao, sa post-fight press conference na “Forty is the new twenty.”

Nagustuhan naman ito ni Pacquiao, nilabanan si Broner na may sipon.

“I got the cold from the weather here. I went to the ring with the cold but I still focused and did my best,” ani Pacquiao.

Matapos naman ang laban ay umakyat si Broner sa ring na tila kumbinsidong siya ang nagwagi.

“I beat him. Everybody out there knows I beat him. I controlled the fight. He (Pacquiao) was missing. I hit him clean more times. I beat him,” wika ni Broner. “You know I beat that boy. They are just trying to get that money with Pacquiao and Floyd. I beat him. That’s smart boxing,” dagdag pa nito.

Ngunit iba naman ang makikita sa Compubox.

Bumitaw si Pacquiao ng kabuuang 568 punches at kumonekta ng 112 kumpara sa 50-of-295 ni Broner.

 “I swear to God that I feel good and look good,” sabi ni Broner, ang dating world champion sa apat na weight classes. “But he hurt me a couple of times. As you can see I wear glasses for fashion. I ain’t got any mark on my face. I’m happy with my performance.”