La Salle-Dasma inilista ang unang panalo
MANILA, Philippines – Kaagad napigilan ng De La Salle University-Dasmariñas ang Colegio San Agustin-Biñan patungo sa 25-23, 25-18, 21-25, 25-16 panalo para wakasan ang kampanya sa Philippine Superliga Collegiate Grand Slam kahapon sa Mall of Asia Arena sa Pasay City.
Malakas na puwersa ang nanggaling kay Rain Cyrill Ramos nang magtala ng 14 puntos na lahat ay galing sa attacks para manduhan ang Lady Patriots sa attack line at net defense.
Ito ang unang panalo ng La Salle-Dasma sa limang laro para saluhan ang San Agustin sa No. 5 spot na may parehong 1-4 baraha sa pagtatapos ng eliminasyon.
“Finally nakuha namin ‘yung panalo dito sa PSL. Ang gandang exit po ito para sa amin dahil lahat ng training namin, ‘yung pagod namin nagbunga na po at last. Iyong huwag sumuko, ‘yun ang natutunan namin dito sa PSL. Push through pa rin,” ani Ramos.
Nakatuwang ni Ramos sa matikas na ratsada si team captain Eunice Castillo na humataw ng pitong attacks kabilang ang game-winning hit kasama pa ang anim na aces at tatlong blocks sa para sa La Salle-Dasma.
“Nakinig lang kami sa coaches namin and at the same time i-apply ‘yung mga ginagawa namin sa training. Ise-celebrate namin ‘yung panalo namin dito sa PSL,” sambit ni Castillo.
Nanguna naman para sa San Agustin si Lency Duarte na nagrehistro ng 12 attacks at isang ace.
Maghaharap bukas ang University of Santo Tomas at University of the Philippines sa championship round sa alas-4 ng hapon at ang battle-for-bronze match ng University of the East at FEU sa alas-2 sa The Arena.
- Latest
