Petron lumapit sa korona ng AFC
MANILA, Philippines — Rumatsada ang Petron Blaze Spikers para kunin ang 25-23, 25-11, 25-17 panalo laban sa F2 Logistics sa Game One para makalapit sa inaasam na kampeonato sa Philippine Superliga All-Filipino Conference kagabi sa Mall of Asia Arena sa Pasay City.
Nagtulong sina Sisi Rondina, Bernadeth Pons at Aiza Maizo-Pontillas para buhatin ang Blaze Spikers sa 1-0 bentahe sa kanilang best-of-three championship series.
“Stick to game plan lang kami. Kailangan huwag lang kami mawala lalo na medyo slow start kami kanina,” ani Rondina na umiskor ng 11 attacks.
Gumawa rin ng mga krusyal na puntos sina Remy Palma at Mika Reyes mula sa magagandang sets ni Rhea Dimaculangan para sa Blaze Spikers.
Ito ang ika-13 sunod na panalo ng Petron para makadikit sa tangkang sweep sa komperensiya.
Nagawa na ito ng Blaze Spikers noong 2015 matapos walisin ang lahat ng kanilang asignatura para makuha ang All-Filipino Conference title.
Samantala, tinalo naman ng Generika-Ayala ang Cignal, 25-12, 30-28, 25-13, para sa third-place trophy.
Pinamunuan ni Patty Orendain ang mga Lifesavers mula sa kanyang tinapos na 11 points, 4 blocks at 1 ace.
- Latest