Bumawi ang Aces

MANILA, Philippines — Magandang three-point shooting at mahigpit na depensa ang naging sandata ng Alaska para balikan ang Magnolia sa Game Three, 100-71 sa 2018 PBA Governo’s Cup Finals kagabi sa Ynares Center sa Antipolo City.

Humakot si import Mike Harris ng 36 points at 18 rebounds para idikit ang Aces sa 1-2 sa kanilang best-of-seven championship series ng Hotshots.

“My teammates did a good job of working the pick and roll,” sabi ng 35-anyos na si Harris. “It started with our defense and the intensity of our guards.”

Matapos kunin ng Magnolia ang first period, 22-16, ay kumamada ans Alaska sa second quarter sa likod ng 4-of-7 shooting ni Simon Enciso sa 3-point range para iposte ang 17-point lead, 50-33, sa natitirang 57.9 segundo.

Sa first half ay mayroon lamang anim na turnovers ang Ace kumpara sa 12 ng Hotshots.

Nag-init naman nang husto si Harris sa third canto nang humataw ng 22 points na tinampukan ng tatlong sunod na triple, ang isa ay isang four-point play kay import Romeo Travis, para ilista ang 30-point advantage, 79-49, ng Alaska sa huling 1:43 minuto.

Itiniklop ng Aces ang nasabing yugto tangan ang 83-50 bentahe.

“Sa akin naman since the start of conference ready ako eh. Siguro dahil sa hardwork nakapag-deliver ako ngayon,” sabi ni Carl Bryan Cruz, nagdagdag ng 10 points kasama ang dalawang tres para sa tropa ni coach Alex Compton.

At mula dito ay hindi na nakabangon pa ang Hotshots, kinuha ang 100-84 at 77-71 panalo sa Games One at Two, ayon sa pagkakasunod.

Nagdesisyon ang Alaska at Magnolia na tuluyan nang ipahinga sina Harris at Travis para ipreserba ang kanilang mga lakas sa Game Four sa Miyerkules.