Blaze Spikers kinumpleto ang sweep sa elims
MANILA, Philippines — Mainit ang harurot ng reigning champion Petron nang payukuin ang Smart Giga Hitters, 25-23, 25-13, 25-12, upang makumpleto ang sweep sa eliminasyon sa Philippine Superliga All-Filipino Conference kahapon sa Caloocan Sports Complex.
Walang makapigil sa Blaze Spikers na tumuloy sa 10-0 rekord na dadalhin nila sa quarterfinal round.
Nakalapit ang Blaze Spikers sa tangkang maduplika ang kanilang pagwalis sa All-Filipino noong 2015 kung saan nagrehistro ang tropa ng 13-0 rekord para makuha ang kampeonato.
Halimaw sa pagkakataong ito si Remy Palma na nagrehistro ng 15 points mula sa pitong attacks, limang aces at tatlong blocks, samantalang naasahan din si middle blocker Mika Reyes na may anim na attacks, apat na blocks at isang ace.
Malaki rin ang kontribusyon ni team captain Ces Molina gayundin sina Sisi Rondina, Bernadeth Pons, Aiza Maizo-Pontillas at playmaker Rhea Dimaculangan na siyang nagmando sa opensa ng Blaze Spikers.
Tinapos ng Giga Hitters ang eliminasyon hawak ang 4-6 baraha.
Sa Collegiate Grand Slam, pinataob ng University of Santo Tomas ang University of the Philippines, 25-22, 25-17, 25-19.
Ginulantang naman ng Colegio San Agustin-Biñan ang Far Eastern University, 25-17, 25-22, 12-25, 18-25, 15-12, para hablutin ang kanilang pambuenamanong panalo sa tatlong pagsalang.
- Latest