Pacquiao vs Broner paiinitin na
MANILA, Philippines — Matapos bumisita sa Oxford at Cambridge sa United Kingdom ay muling bibiyahe si Filipino world eight-division champion Manny Pacquiao sa susunod na linggo.
Ito ay para naman sa kanilang dalawang itinakdang press conference ni American world four-division titlist Adrien Broner.
Opisyal nang ihahayag ang bakbakan nina Pacquiao, ang World Boxing Association welterweight tile-holder, at Broner sa isang press confe-rence sa Lunes (US time) sa New York.
Kinabukasan ay dadalhin naman ang press conference nina Pacquiao (60-7-2, 39 KOs) at Broner (33-3-1, 24 KOs) sa Los Angeles, California.
Malaki ang tsansang gawin ang suntukan ng 39-anyos na si Pacquiao at ng 29-anyos na si Broner sa Enero 19 sa MGM Grand Garden Arena sa Las Vegas, Nevada.
Napasakamay ni Pacquiao ang suot na WBA world welterweight title ni Lucas Matthysse (39-5, 36 KOs) matapos talunin ang pambato ng Argentina via seventh-round TKO noong Hulyo 15 sa Kuala Lumpur, Malaysia.
Ito naman ang unang laban ni Broner makaraan ang isang 12-round majority draw kay Jessie Vargas (28-2-2, 10 KOs) noong Abril 21 sa Barclays Center sa Brooklyn.
Sakaling manalo kay Broner ay inaasahang maitatakda ang rematch nina Pacquiao at Floyd Mayweather, Jr. (50-0-0, 27 KOs).
Tinalo ng 41-anyos na si Mayweather, ibinasura kamakailan ang naunang inihayag na laban niya kay Japanese kickboxing sensation Tenshin Nasukawa, si Pacquiao via unanimous decision sa kanilang super fight noong 2015.
- Latest