Yeng Guiao tiwala sa Gilas Pilipinas

MANILA, Philippines — Tiwala si head coach Yeng Guiao na makukuha ng Gilas Pilipinas ang kundisyon at chemistry nito sa takdang oras kahit kulang-kulang pa sa ngayon ang kanyang 20-man national team training pool para sa napi-pintong fifth window ng 2019 International Basketball Federation (FIBA) World Cup Asian Qualifiers.

Labingdalawa mula sa 20 manlalaro pa lang kasi ang nagpakita sa kanilang unang ensayo sa Meralco Gym sa Ortigas, Pasig City na sina Jayson Castro, Alex Cabagnot, Marcio Lassiter, Gabe Norwood, Arwind Santos, Matthew Wright, Troy Rosario, Beau Belga, June Mar Fajardo, JP Erram gayundin sina Gilas cadets Kai Sotto at Ricci Rivero.

Hindi nakapag-sanay sina Christian Standhardinger (sakit ng tiyan) gayundin si Stanley Pringle na kasalukuyan pang nasa Amerika ngunit babalik na sa Pilipinas sa Huwebes.

Wala rin sa simula ng ensayo ng koponan sina LA Tenorio, Scottie Thompson, Greg Slaughter, Japeth Aguilar, Ian Sangalang at Paul Lee na pinahintulutan ni Guiao na ituon muna ang atensyon sa idinaraos na 2018 Philippine Basketball Association (PBA) Governors’ Cup semi-finals sa pagitan ng Ginebra at Magnolia.

“I would have wanted that we’re complete but were losing six guys to the teams that are playing in the semifinals right now. We just ghave to be patient and keep practicing this week,” ani Guiao. “We’ll practice with who we have and what we have until the series is over. We’ll practice with who we have and what we have until the series is over.”

Sa kabutihang palad ayon kay Guiao, walang problema sa kanilang unang ensayo dahil madaling nakuha ng mga manlalaro ang sistema dahil na rin sa nanatiling chemistry nila simula pa sa Asian Games noong Agosto at fourth window ng Asian Qualifiers noong Setyembre.

“I don’t think I’ll be having problems in terms of chemistry and cohesion. Yung leftover chemistry namin from the 4th window and the Asian games is still there,” aniya.