Sotto masusubukan ng mga PBA big men
MANILA, Philippines — Hindi man makita ngayon ni Kai Sotto ang bunga ng pambihirang pagkakataon na mapasama sa Philippine men’s national basketball team ay sigurado ang kanyang ama na si Ervin na aanihin niya ito sa hinaharap.
“Sabi ko sa kanya, kung titingnan mo, parang magsasaka ka,” wika ni Ervin na dating PBA player, kay Sotto.
“Nagtatanim ka pa lang ngayon ng mga aanihin mo. Aanihin mo rin iyan kaya ipagpatuloy mo lang ‘yung mga tamang ginagawa mo para sa sarili mo.”
Edad 16-anyos pa lamang kasi ay masusukat ngayon ang kilatis ng 7-foot-1 Filipino teen sensation matapos mapili bilang isa sa 20-man Team Pilipinas training pool na pinangalanan ni head coach Yeng Guiao noong nakaraang linggo.
Bago at mas mataas na level ang papasuking misyon ng Ateneo standout na si Sotto lalo’t hindi na mga kapwa niya high school players ang kanyang makakasama at makakatunggali.
Nakatakdang masubok si Sotto ng mga PBA big men na sina Greg Slaughter, JP Erram, Beau Belga, Christian Standhardinger, Japeth Aguilar at four-time Most Valuable Player June Mar Fajardo.
Para kay Guiao, malaking tulong ito kay Sotto dahil mapapabilis ang kanyang development matapos maghari sa kanyang mga youth counterparts dito sa bansa pati na sa Asya bunsod ng mga tagumpay ng Batang Gilas noong 2017 FIBA U-16 Asia Championship, 2017 FIBA U-17 World Cup at 2018 FIBA U-18 Asia Championship.
Ayon pa kay Guiao, paraan ito para maihanda si Sotto sa mas malalaking laban sa susunod bilang ‘future’ ng Philippine basketball.
“With Kai, we have nothing to lose, we have everything to gain. I’d like to see him play against the big boys and be able to accelerate his development,” ani Guiao kay Sotto.
Naniniwala rin ang veteran national mentor na si Sotto ang susunod na magiging basketball superstar ng bansa.
“I think Kai is our future and we’re just trying to make use of the opportunity for him to be developed an upgrade the compettion kasi dominado niya na ‘yung high school eh,” sabi ni Guiao kay Sotto
Hindi rin aniya magugulat si Guiao kung makakasabit si Sotto sa kanyang ihahayag na Final 12 na sasagupa sa Kazakhstan sa Nobyembre 30 at sa Iran sa Disyembre 3.
“Baka gulatin tayo, baka makakuha ng spot sa Final 12. We have nothing to lose here.”
- Latest