Pang-6 na ng Meralco

Do-or-die vs Phoenix

MANILA, Philippines – Ikinukunsidera ni one-time PBA Grand Slam champion coach Norman Black ang pagsagupa ng No. 7 Meralco sa No. 2 Phoenix sa isang ‘do-or-die’ match bilang ikaanim na sunod nilang knockout game.

“We have to win another game. In our case, this is our fifth straight win which was basically a knockout game,” sabi ni Black. “Now, we have to play another game, a sixth knockout game in order to advance into the semifinals.”

Muling lalabanan ng Bolts ang Fuel Masters sa ikalawang sunod na pagkakataon para sa pang-apat na semifinals ticket ngayong alas-7 ng gabi sa 2018 PBA Governor’s Cup sa Smart Araneta Coliseum.

Pinuwersa ng Meralco ang Phoenix, may hawak na ‘twice-to-beat’ advantage, sa isang knockout match matapos kunin ang 90-74 panalo noong Miyerkules.

Sa nasabing tagum-pay ng Bolts ay kumolekta si two-time PBA Best Import Allen Durham ng 26 points, 16 rebounds at 3 blocks habang nagdagdag sina 2017 PBA Rookie of the Year Chris Newsome at Baser Amer ng 16 at 14 markers, ayon sa pagkakasunod.

Tanging sina reinforcement Eugene Phelps at Calvin Abueva ang nag-lista ng double-figures sa panig ng Fuel Masters ni mentor Louie Alas.

Bukod kina Durham, Newsome at Amer, muli ring sasandalan ng Meralco sina veterans Reynel Hugnatan at Jared Dillinger katuwang si guard Mike Tolomia.

Aasahan naman nina Phelps at Abueva na magbibigay ng kanilang kontribusyon sina Matthew Wright, JC Intal at rookie forward Jason Perkins sa panig ng Phoenix.

Ang mananalo sa pagitan ng Bolts at Fuel Masters ang haharap sa Alaska Aces, sinibak ang San Miguel Beermen, 96-85 noong Miyerkules, sa isang best-of-five semifinals series.

Magtatagpo naman sa isa pang semis showdown ang nagdedepensang Barangay Ginebra at Magnolia para sa kanilang ‘Manila Clasico.’