Nagdeliber si Standhardinger
MANILA, Philippines — Wala siyang pamatay na low-post plays kagaya ni four-time PBA MVP June Mar Fajardo at scoring power nina Jayson Castro at Terrence Romeo.
Ngunit nagagawa niya ang kanyang trabaho para sa San Miguel.
Pinamunuan ni Fil-German rookie Christian Standhardinger ang statistical race para sa Best Player of the Conference ng 2018 PBA Governors’ Cup.
Kumamada si Standhardinger ng average na 43.1 statistical point para banderahan ang lahat ng local players sa scoring at rebounding.
Siya lamang ang tanging player na nagposte ng double-double averages para sa Beermen sa season-ending conference.
Humakot ang 29-anyos na si Standhardinger ng mga averages na 23.3 points at 13.6 rebounds bukod pa sa kanyang 1.6 assists, 0.9 steal at 0.6 block. Sumesegunda si Ginebra center/forward Japeth Aguilar sa kanyang 34.8 SPs mula sa mga averages na 19.9 points, 6/9 rebounds, 1.8 assists, 1.0 block at 0.5 steal.
Ang iba pang nasa Top 10 ay sina Chris Banchero (34.2), ng Alaska, Stanley Pringle (34.0) ng NorthPort, Calvin Abueva (31.9) ng Phoenix, Sean Anthony (31.3) ng NorthPort, Paul Lee (30.9) ng Magnolia, Terrence Romeo (30.4) ng TNT Katropa, Scottie Thompson (30.1) ng Ginebra at Jerramy King (29.1) ng Columbian.
Si Banchero ang nangunguna sa assists mula sa kanyang average na 8.7, habang si Anthony ang numero uno pagdating sa steals (2.25).
Sa Best Import race ay nasa No. 1 si Mike Harris ng Alaska sa kanyang average na 60.4 SPs sa itaas nina Justin Brownlee (59.1) ng Ginebra, Eugene Phelps (58.0) ng Phoenix, Aaron Fuller (57.4) ng NLEX.
Dahil sa pagsibak ng Gin Kings sa Road Kings sa kanilang quarterfinal match ay nawala na sa kontensyon si Fuller.
- Latest
