Meralco ‘di pa sumuko

MANILA, Philippines — Nang kumawala ang No. 7 Meralco sa third quarter ay hindi na nila nilingon ang No. 2 Phoenix.

Umiskor si two-time PBA Best Import Allen Durham ng 26 points, 16 rebounds at 3 blocks habang nagdagdag ng pinagsamang 30 markers sina Chris Newsome at Baser Amer para pamunuan ang Bolts sa 90-74 paggupo sa Fuel Masters at maitakda ang ‘do-or-die’ match ng kanilang quarterfinals duel sa 2018 PBA Governor’s Cup kahapon sa Cuneta Astrodome sa Pasay City.

Tumapos si Newsome, ang 2017 PBA Rookie of the Year, na may 16 points kasunod ang 14 markers ni Amer para sa Meralco.

“From start to finish, we were able to execute defensively,” ani one-time PBA Grand Slam champion coach Norman Black. “We really clamped down better on defense and our shots started falling (sa second half).”

Sa likod nina Phelps, Calvin Abueva at Matthew Wright ay nakabangon mula sa 15-point deficit Fuel Masters at lumapit sa 68-78 agwat sa 4:56 minuto ng labanan.

Muling sinandigan ng Bolts sina Durham, Newsome at Amer para muling malayo sa 88-72 sa huling dalawang minuto ng laro.