Lady Eagles dinagit ang Fighting Warays para patuloy na dominahin ang torneo
MANILA, Philippines — Tuloy ang matayog na paglipad ng Ateneo de Manila University matapos dagitin ang 25-19, 25-21, 21-25, 25-19 panalo laban sa Tacloban Fighting Warays para mapatatag ang kapit sa solong pamumuno sa Premier Volleyball League Season 2 Open Conference kahapon sa The Arena sa San Juan City.
Muling naasahan ng Lady Eagles sina Kat Tolentino, Maddie Madayag, Bea De Leon at Vanessa Gandler para kubrahin ng kanilang tropa ang ikawalong panalo sa 10 pagsalang.
Ngunit nagsilbing pambuhay ng Ateneo si reserve outside hitter Jules Samonte na kumana ng walong importanteng puntos sa fourth set kabilang ang pitong krusyal na attacks.
Desidido ang Fighting Warays na dalhin ang laro sa fifth set nang kunin ang 14-10 kalamangan sa fourth set sa likod nina Heather Guinoo, Dimdim Pacres at Jovielyn Prado.
Subalit nagpasabog ang Lady Eagles ng 9-1 run sa pangunguna nina Samonte at Gandler para maagaw ang bentahe sa 20-16.
Dumikit pa ang Tacloban sa 21-19 subalit agad na sumaklolo sina De Leon at Tolentino na siyang nagmando sa opensa at depensa sa net para kunin ang huling apat na puntos at maiselyo ang panalo.
Kumana si Guinoo ng 16 puntos sa kanyang pagbabalik sa aksyon para sa Fighting Warays habang nagtala naman si Pacres ng 13 markers.
Ngunit hindi ito sapat para hatakin ang Tacloban sa panalo.
Ito ang ikalawang sunod na kabiguan ng Fighting Warays (4-6) para malugmok sa No. 6 spot.
- Latest