NLEX nagpalakas pa sa quarterfinals

MANILA, Philippines – Kinailangan pa ng NLEX ng five-minute extra period at ang kabayanihan ni veteran center JR Quiñahan palakasin ang kanilang tsansa sa silya sa eight-team quarterfinal round.

Isang three-ponit shot at apat na sunod na free throws ni Quiñahan sa dulo ng extension ang nagtakas sa 116-110 panalo ng Road Warriors laban sa Alaska Aces sa 2018 PBA Governor’s Cup kahapon sa Ynares Center sa Antipolo City.

Kasabay ng pagpigil sa kanilang three-game losing skid ay ang pagpapalakas ng NLEX sa kanilang tsansa sa quarterfinals bitbit ang 5-5 win-loss record.

Nadiskaril naman ang hangarin ng Alaska, may 7-3 baraha kagaya ng Phoenix, na maibulsa ang isa sa apat na ‘twice-to-beat’ incentive.

Matapos ang basket ni Chris Banchero para sa 110-109 abante ng Aces sa 1:06 minuto ng overtime ay nagsalpak naman ng triple si Quiñahan para sa 112-110 bentahe ng Road Warriors.

Sinundan ito ng Cebuano bigman ng apat na free throws laban kay Alaska import Mike Harris para sa 116-110 kalamangan ng NLEX sa natitirang 9.4 segundo.

Nauna nang itinayo ng Road Warriors ang 14-point lead sa third period bago nakatabla ang Aces sa pagtatapos nito, 77-77 at tuluyang ilista ang 10-point advantage, 94-84.

Hindi naman sumuko ang NLEX sa likod ni import Aaron Fuller para dalhin ang Alaska sa extension, 99-99.