Debut ni James sa Lakers diniskaril ng Blazers
PORTLAND, Ore. -- Binuksan ni LeBron James ang kanyang debut para sa Los Angeles Lakers sa pamamagitan ng dalawang dumadagundong na slam dunks.
Ngunit diniskaril ito ng Trail Blazers.
Umiskor si Damian Lillard ng 28 points at humakot si Nik Stauskas ng 24 markers para pangunahan ang Portland sa 128-119 panalo laban sa Los Angeles sa kanilang season opener.
Tumapos naman si James na may 26 points at 12 rebounds para sa una niyang laro suot ang uniporme ng Lakers.
“It’s not instant oatmeal. It’s not that fast,” paliwanag ni James. “It takes some time to get that chemistry where you can just close your eyes and know exactly where guys are.”
Ang dunk ni James ang gumulat sa Moda Center crowd, habang nakatingin si Nike co-founder Phil Knight mula sa kanyang courtside seat.
Pumirma si James sa isang four-year, $153 million deal sa Lakers bilang free agent sa offseason matapos manalo ng tatlong NBA championship rings para sa Miami Heat at Cleveland Cavaliers.
Dinala ni James ang Heat at Cavaliers sa huling walong NBA Finals.
Sumama ang four-time league MVP sa revamped group ng Lakers na kinabibilangan nina veterans Rajon Rondo, JaVale McGee, Lance Stephenson at Michael Beasley para makatulong kina Brandon Ingram, Lonzo Ball, Kyle Kuzma, Josh Hart at rookie Moe Wagner.
Ang putback ni James ang nagbigay sa Los Angeles ng 10-point lead, 25-15.
Naagaw naman ng Portland ang 65-63 abante sa halftime mula sa 16 points ni Staukas, samantalang may 13 at 12 markers naman sina Lillard at Jusuf Nurkic, ayon sa pagkakasunod.
Nakadikit ang Lakers sa 104-109 agwat sa huling anim na minuto ng fourth period bago nagsalpak si McCollum ng isang 18-footer at three-pointer para muling ilayo ang Trail Blazers sa 114-104.
Sa Philadelphia, kumolekta si Ben Simmons ng triple-double mula sa kanyang tinapos na 13 points, 13 rebounds at 11 assists at humakot naman si star center Joel Embiid ng 30 points at 12 rebounds para pangunahan ang 127-108 paggiba ng 76ers laban sa sa bisitang Chicago Bulls.
Binanderahan ni Zach LaVine ang Bulls mula sa kanyang 30 points.
Sa Washington, ang putback ni forward Kelly Olynyk mula sa mintis na jumper ni Dwyane Wade sa huling 0.2 segundo ang naglusot sa 113-112 panalo ng Miami Heat kontra sa Wizards, naglaro na wala ang bagong sentrong si Dwight Howard para sa kanilang season opener.
Pinamunuan ni Josh Richardson ang Heat mula sa kanyang 28 points, habang nagdagdag si Rodney McGruder ng 20 markers.
- Latest
