Red Lions sinakmal ang top spot sa Final 4
MANILA, Philippines — Binawian ng nagdedepensang San Beda Red Lions ang Lyceum Pirates, 75-68, para makuha ang top spot sa Final Four ng 94th NCAA basketball tournament kahapon sa FilOil Flying V Center sa San Juan City.
Sinandalan ng Red Lions ang mahigpit na depensa at matikas na run-and-gun game para masungkit ang kanilang pang-16 panalo sa 17 laro.
Tatapusin ng tropa ni coach Boyet Fernandez ang elimination round sa pagharap sa Perpetual Help Altas sa Martes.
Tinapos naman ng 93rd season runner-up na Pirates ang double round elimination sa ikalawang puwesto sa 15-3 kartada.
Makakaharap ng No. 1 seed Red Lions ang No. 4 Altas sa Final Four, habang lalabanan ng No. 2 Pirates ang No. 3 Letran Knights.
Kapwa bitbit ng San Beda at Lyceum ang ‘twice-to-beat’ incentive.
Matapos ang dikit na laban sa first half ay nagpakawala ang Red Lions ng 20-8 run sa ikatlong yugto upang itala ang 59-39 bentahe mula sa jumper ni Robert Bolick tungo sa paghihiganti sa kanilang 66-73 pagkatalo sa Pirates sa first round noong Agosto 21.
Nahuli na ang arangkada ni reigning MVP CJ Perez at naibaba lamang nila ang agwat sa limang puntos, 66-71, sa 1:05 na lang ang nalalabi sa laro.
Nagpakita ng gilas si rookie Fil-Canadian James Canlas sa kanyang career-high na 18 points, habang si Bolick ay may 17 markers at naglista ng 15 points at 14 boards si import Donald Tankoua.
Sa juniors’ division, tinalo ng Red Cubs ang Junior Pirates, 83-76.
- Latest