Pacquiao out na kay Crawford

MANILA, Philippines — Ilang beses nang lumabas ang pangalan ni American boxing superstar Terence Crawford para sa posibleng makalaban ni Filipino world eight-division champion Manny Pacquiao.

Ngunit hanggang matapos ang kontrata ni Pacquiao sa Top Rank Promotions ay hindi ito nagawang plantsahin ni Bob Arum.

Nakatakdang itaya ni Crawford (33-0-0, 24 KOs) ang kanyang suot na World Boxing Organization welterweight belt laban kay 10th-ranked challenger Jose Benavidez, Jr. (27-0-0, 18 KOs) ngayon sa Omaha, Nebraska.

Ang naturang korona ay dating suot ni Pacquiao na inagaw ni Jeff Horn noong 2017 sa Brisbane, Australia na pinitas naman ni Crawford sa Australian noong Hunyo sa Las Vegas, Nevada.

Manalo man kay Benavidez ay walang plano si Crawford na labanan si Pacquiao  (60-7-2, 39 KOs).

“He don’t have the super belt. That’s the champion in my eyes. I look at the number one champion in the division,” sabi ng 31-anyos na si Crawford sa 39-anyos na si Pacquiao na inangkin ang WBA welterweight title mula kay Lucas Matthyse ng Argentina noong Hulyo sa Kuala Lumpur, Malaysia.

Kamakailan ay napaulat ang pagpirma ni Pacquiao sa Premier Boxing Champions ni Al Haymon, ang long-time adviser ng 41-anyos na si Floyd Mayweather, Jr. (50-0, 27 KOs).

Dahil dito ay tiyak nang maikakasa ang rematch nina Pacquiao at Mayweather sa 2019 matapos ang unanimous decision win ng American world five-division titlist sa kanilang super fight noong 2015.

Isang two-fight deal ang sinasabing nilagdaan ni ‘Pacman’ sa boxing promotions ni Haymon.

Matapos ang rematch kay Mayweather ay posibleng makasagupa ni Pacquiao ang sinuman kina WBA king Keith Thurman (28-0-0, 22 KOs), WBC titlist Shawn Porter (29–2–1, 17 KOs) at IBF ruler Errol Spence Jr. (24–0–0, 21 KOs).