Phl team kinapos sa playoffs

2018 FIBA 3x3 Under-23 World Cup

MANILA, Philippines — Sa kabila ng impresibong panalo sa huling dalawang laban nito ay kinapos pa rin ang Philippine 3x3 team na maka-sabit sa playoffs ng 2018 International Basketball Federation (FIBA) 3x3 Under-23 World Cup kamakalawa ng gabi sa Xi’an, China.

Matapos simulan ang World Cup sa dalawang dikit na kabiguan kontra sa Slovenia, 21-14 at Serbia, 16-21 ay bumawi ang Pilipinas nang umiskor ng da-lawang sunod na tagumpay upang magkaroon ng pag-asang makapasok sa knockout quarterfinals.

Sa pangunguna nina RJ Abarrientos at Ricci Rivero na nagtala ng siyam at anim na puntos ayon sa pagkakasunod, ibinaon ng Pilipinas ang Turkmenistan, 21-8, upang umangat sa 1-2 at mapanatiling buhay ang pag-asa sa playoffs.

Hindi na nagpaawat sina Abarrientos at Rivero nang muling giyahan ang bansa sa malaking 21-15 pagsilat sa wala pang talong China sa likod ng kanilang 10 at pitong puntos na produksiyon, ayon sa pagkakasunod.

Bunsod nito, umakyat sa 2-2 ang baraha ng Pinas at may tsansa pa sanang makaabante sa knockout quartefinals kung makakapuwersa ng mutiple-tie sa 2-2 kartada kasama ang China at Slovenia.

Subalit nanalo ang China kontra sa Serbia, 21-12 at Slovenia kontra sa Turkmenistan, 21-10 upang umabot sa 3-1 baraha na tuluyang nagsara ng pinto sa mga Pilipino.

Pumasok sa quarterfinals ang Slovenia at China habang nagkasya naman sa ikatlong puwesto sa Pool C ang Pilipinas na sinamahan din ni Jeepy Faundo at Rhayyan Amsali.

Nangulelat naman ang  Turkmenistan at Serbia na nagtapos sa parehong 1-3 baraha.

Gayunpaman, uuwi ng Pinas ang mga bataan ni head coach Ronnie Magsanoc nang nakataas ang noo matapos mapatunayan kaya nitong maki-pagsabayan sa mga world powerhouses ng 3x3 sa kabila ng maikling panahong paghahanda at hindi pa gaanong kasolidong koponan.