Ancajas guest sa ONE Championship

MANILA, Philippines — Personal na mapapanood ni Filipino world super flyweight champion Jerwin “Pretty Boy” Ancajas ang isa sa kanyang pinupuntirya para sa unification championship fight.

Magiging panauhin si Ancajas sa ‘Kingdom of Heroes’ ng ONE Championship, ang premier martial arts organization sa Asya, sa Sabado sa Bangkok, Thailand.

Itataya ni Thai superstar Srisaket Sor Rungvisai (46-4-1, 41 KOs) ang kanyang suot na World Boxing Council super flyweight crown laban kay Mexican challenger Iran “MagnifiKO” Diaz (14-2-3, 6 KOs).

Ito ang kauna-unahang boxing bout na gagawin ng ONE Championship.

Inaasahang pag-aaralan ni Ancajas, may 30-1-2, win-loss-draw record kabilang ang 20 KOs, ang mga galaw at istilo ni Rungvisai, dalawang beses tinalo ang dating ‘pound-for-pound’ king na si Roman ‘Chocolatito’ Gonzalez ng Nicaragua.

Galing ang tubong Panabo City, Davao del Norte sa isang split draw laban kay Mexican challenger Alejandro Santiago (16-2-5, 7 KOs) sa kanyang ikaanim na sunod na pagdedepensa sa International Boxing Federation super flyweight belt noong Sabado sa Oakland, California.

Isa si Rungvisai sa mga gustong hamunin ni Ancajas para sa isang unification championship fight bukod kay World Boxing Association titlist Khalid Yafai (23-0-0, 14 KOs) ng United Kingdom.

Hangad naman ni Diaz na maging ika-187 world boxing champion ng Mexico, pinagmulan nina Ricardo Lopez, Marco Antonio Barrera, Erik Morales, Salvador Sanchez, Ruben Olivares, Juan Manuel Marquez at Julio Cesar Chavez.

“Mexican boxers are the best in the sport. It’s in our blood, and I am proud to represent my country here on the global stage,” sabi ni Diaz.