Perpetual solo sa 4th

MANILA, Philippines — Nasungkit ng Perpetual Help Altas ang ika-apat sunod na panalo matapos padapain ang Mapua Cardinals, 88-71 habang sinorpresa naman ng Emilio Aguinaldo Generals ang St. Benilde Blazers, 69-67 kahapon sa pagpapatuloy ng 94th NCAA basketball tournament sa The Arena sa San Juan City.

Nag-ambag ng 25 puntos kabilang ang apat na triples sina Kim Aurin at Jielo Razon sa first half pa lamang tungo sa malaking panalo upang umangat sa solo fourth spot sa 9-5 win-loss kartada at ibaon ang Cardinals sa 4-10 card.

“Well, that’s the target actually, we want to keep on winning para umabot sa Final Four. We have two more games before we face Letran and San Beda. We are playing San Sebastian next week then EAC. Those games are must-win games,” sabi ni UPHSD coach Frankie Lim.

Tumapos si Aurin ng 23-puntos at apat na assists habang si Razon ay tumulong ng 19 at anim na rebounds para sa tropa ni coach Lim.

“Yung last game namin sa JRU at sa ngayon against Mapua, if we lose of those games parang mababale-wala naman ‘yung panalo namin sa Lyceum. I’m giving full confidence to them to perform better each game,” dagdag ni Lim.

Patuloy naman ang hataw ni Prince Eze sa kanyang 17 puntos at 15 rebounds at 12 mula kay Edgar Charcos na may kasamang limang rebounds at anim na assists para sa Altas.

Sa ikalawang laro, nabigo naman ang St. Benilde Blazers na manatili sa top four matapos matalo sa EAC Generals kaya bumagsak sila sa solo fifth spot sa 8-6 record.

Umiskor si JP Magullano ng pitong sunod na puntos sa krusyal stretch kabilang na ang go-ahead basket sa huling 1:59 para sa 67-65 bentahe ng Generals.

“This game is important for CSB (Blazers) but it is more important for us. Pagnatalo pa kami dito, magiging last na kami sa standings,” sabi ni EAC coach Ariel Sison na umakyat sa 3-11 slate.