Phl Dragonboat overall champions

MANILA, Philippines — Nakahirit pa ang national team ng isang ginto sa hu-ling araw ng kumpetisyon upang masiguro ang overall title sa 2018 International Canoe Federation Dragon Boat World Championships na ginanap sa Lake Lanier Olympic Park sa Gainesville, Georgia sa Amerika.

Magarbong tinapos ng Pinoy paddlers ang kampanya nito matapos mangibabaw sa 10-seater senior men’s 200-meter race sa bilis na 47.39 segundo para palugmukin ang Italy sa ikalawang puwesto (49.58) at Hungary sa ikatlong posisyon (49.87).

Magkakatuwang sina Mark Jhon Frias, Hermie Macaranas, Ojay Fuentes, John Lester Delos Santos, Oliver Manaig, Reymart Nevado, Lee Robin Santos, Jordan De Guia, Roger Masbate at John Paul Selencio sa pagkopo ng naturang medalya.

Humataw ng husto ang Pinoy squad sa huling ba-hagi ng karera nang magbigay ng signal sina drummer Patricia Bustamante at steersman Maribeth Caranto na ibuhos na ang lahat para ungusan ang Italians.

Humakot ang Pilipinas ng kabuuang limang ginto, dalawang pilak at dalawang tansong medalya para malagpasan ang limang ginto at isang pilak na nakuha ng tropa noong 2012 edisyon sa Milan, Italy.

“I was a part of that team that did it in Italy. I knew these kids are special, so I’m not surprised when they beat the previous record,” wika ni national team coach Diomedes Manalo.

Nauna nang nakahirit ng ginto ang Pilipinas sa 200m senior mixed 10-seater (50.469), 200m senior mixed 20-seater (43.481), 500m 10-seater senior mixed event (2:07.506) at 500m senior mixed 20-seater (1:52.580).

Buhat naman ang pilak sa 2000m 20-seater senior mixed race (8:43.985) at 500m men’s senior 10-seater event (2:06.188) habang nakatanso rin ang koponan sa 200m men’s masters 40-over 10-seater (52.094) at 200m mixed masters 40-over 10-seater (55.209).

Ito ang parehong koponang sumabak sa 18th Asian Games na ginanap sa Jakarta at Palembang sa Indonesia subalit bigo ang Pinoy paddlers na makakuha ng kahit isang medalya sa Asian meet.

Noong 2015 Southeast Asian Games sa Singapore, bukod-tanging isang tanso lamang ang nakuha ng Pinoy squad mula sa women’s 200m six-crew event.

Sinasabing, ibang specification ang bangkang pinagamit sa kanila sa Asian Games na nakaapekto sa kanilang performance.