Pinay spikers susubukang manalo sa Japan
JAKARTA — Matapos ang three-set loss sa Thailand kamakalawa ay isa pang matinding kalaban ang haharapin ngayon ng Philippine women’s volleyball team sa pagpapatuloy ng volleyball competition sa Bulungan Sports Hall dito.
Anuman ang resulta ng labang ito at maging ng katatapusan ng kampanya ng Phl volleybelles ay hindi mahalaga.
Ang importante ay ang karanasang makukuha ng koponan bilang paghahanda para sa 30th Southeast Asian Games na iho-host ng Pilipinas sa susunod na taon.
“We have to be able to play in the tournaments like this for experience,” ani Alyssa Valdez. “We have the talent to play in this level.”
Matapos ang 10 araw na training sa Japan bago ang Asian Games, inaasahang may matututunan pa ang mga Pinay sa laban kontra sa mga Haponesa sa alas-4:30 ng hapong sagupaan (5:30 Manila time).
Matapos ang Japan ay haharapin ng Phl Lady Spikers ang Hong Kong sa alas-12:30 (1:30 p.m. Manila time) sa Huwebes sa Bulungan Sports Hall ulit bago ang host Indonesia sa Sabado sa pagbabalik ng aksyon sa GBK Indoor tennis court.
Kailangan lamang ay magtapos sa top four ang Nationals sa five-team Pool A upang makausad sa knockout stage at ang panalo sa Hong Kong ang inaasahang magtutulak sa Pinas sa susunod na round.
- Latest