Jerwin Ancajas may schedule na

MANILA, Philippines — May petsa na kung kailan muling sasampa ng boxing ring si Filipino world super flyweight champion Jerwin Ancajas.

Ang kulang na lamang ay ang pangalan ng kanyang lalabanan.

Itataya ng 25-anyos na tubong Panabo City, Davao Del Norte ang kanyang suot na International Boxing Federation super flyweight crown sa Setyembre 14 sa Save Mart Arena sa Fresno, California.

“We are getting someone who is aggressive, someone who’s going to bring out the best in Jerwin,” sabi ni Sean Gibbons, ang co-manager ni Ancajas.

Kabilang sa mga posibleng labanan ni Ancajas (30-1-1, 20 KOs) ay sina Alejandro Santiago (16-2-4, 7 KOs) ng Mexico at Miguel Gonzalez (26-1-0, 8 KOs) ng Chile.

Ito ang pang-limang sunod na pagkakataon na idedepensa ni Ancajas sa kanyang IBF super flyweight belt.

Nakamit ni Ancajas ang nasabing IBF belt matapos talunin si Puerto Rican McJoe Arroyo noong Setyembre ng 2016 kasunod ang kanyang seventh-round stoppage kontra kay Mexican Jose Alfredo Rodriguez sa Macau, China.

Isinunod naman ni Ancajas sina Japanese fighter Teiru Kinoshita (seventh-round TKO) noong Hulyo ng 2017 sa Brisbane, Australia at si Irishman Jamie Conlan (sixth round TKO) sa Belfast, Northern Ireland.

Pinahinto naman ni Ancajas si Mexican Israel Gonzalez sa 10th round sa Corpus Christi, Texas bago talunin si Cebuano fighter Jonas Sultan noong Mayo 26 sa Fresno, California.