Pacquiao hinamon ni Khan

MANILA, Philippines — Wala pang opisyal na pahayag si Manny Pacquiao kung sino ang gusto niyang labanan bilang bagong World Boxing Association welterweight champion.

Ngunit sa panayam ng TMZ Sports ay inilinya ni dating British world light welterweight king Amir Khan (32-4-0, 20 KOs) ang kanyang sarili para hamunin si Pacquiao (60-7-2, 40 KOs).

“It’s one of the bigger money fights out there, but it all depends if Manny Pacquiao’s team says yes,” sabi ni Khan, dating sparmate ni Pacquiao sa ilalim ni chief trainer Freddie Roach.

Noong nakaraang linggo ay tinalo ni Pacquiao si Lucas Matthysse (39-5-0, 36 KOs) via seventh-round TKO para agawin sa boxing star ng Argentina ang suot nitong WBA welterweight belt sa Kuala Lumpur, Malaysia.

Hindi nagbigay ng pangalan ang 39-anyos na Filipino world eight-division champion kung sino ang susunod niyang sasagupain.

Noong 2012 ay humiwalay si Khan kina Pacquiao at Roach.

Pinabagsak ni Khan si Phil Lo Greco sa loob ng 39 segundo sa first round noong Abril at nakatakdang harapin si Samuel Vargas sa Setyembre 8 sa Birmingham.

“Look, Manny Pacquiao is a great fighter. I’ve been around training with him for many years,” wika ni Khan. “But sometimes friends have to fight each other. I think it will be an explosive fight. I think it will be a great fight.”

Samantala, plano naman ni Bob Arum ng Top Rank Promotions na kausapin si Pacquiao, itinayo ang sariling MP Promotion, para sa posibleng unification championship fight kay World Boxing Organization welterweight titlist Terence Crawford (33-0-0, 24 KOs).